Hæfismat framkvæmdastjóra og stjórnarmanna eftirlitsskyldra aðila : lagagrundvöllur og framkvæmd Fjármálaeftirlitsins á mati á hæfi framkvæmdastjóra og stjórnarmanna á fjármálamarkaði, lífeyrissjóðsmarkaði og vátryggingamarkaði

Abstract

Hér á landi er gerð sú krafa að framkvæmdarstjórar og stjórnarmenn fjármálafyrirtækja, lífeyrissjóða og vátryggingafélaga auk vátryggingamiðlara, uppfylli ákveðin lögbundin hæfisskilyrði sem eru nánar tiltekin í sérlögum. Um er að ræða bæði jákvæð hæfisskilyrði, líkt og að vera lögráða og hafa yfir að búa nægjanlegri þekkingu og reynslu til að geta sinnt starfinu á tilhlýðilegan hátt, sem og neikvæð hæfisskilyrði svo sem að hafa ekki verið lýstur gjaldþrota eða verið dæmdur fyrir refsiverðan verknað í tengslum við atvinnustarfsemi. Jafnframt er gerð sú krafa að framkvæmdastjórar og stjórnarmenn eftirlitsskyldra aðila séu fjárhagslega sjálfstæðir og skili inn gögnum því til staðfestingar. Þau hæfisskilyrði sem framangreindum aðilum er gert að uppfylla geta ennfremur verið matskennd og kemur það þá í hlut Fjármálaeftirlitsins að skera úr um hvort viðkomandi aðili uppfylli þær kröfur sem lög kveða á um.Meginmarkmið þessarar ritgerðar var að fjalla um umrædd ákvæði með sérstaka áherslu á að reyna að skýra hvað felist í þeim hæfisskilyrðum sem gerðar eru til framangreindra aðila og að varpa skýru ljósi á aðkomu og framkvæmd Fjármálaeftirlitsins á mati á hæfi þessara sömu aðila.