Viðhorf endurskoðenda til siðareglna

Abstract

Undanfarin ár hefur mikil umræða verið um endurskoðendur og störf þeirra. Það vaknaði því áhugi á að kanna nánar starfsumhverfi þeirra og þannig öðlast betri innsýn inn í þann heim sem þeir starfa eftir. Markmiðið með þessari ritgerð er að skoða viðhorf endurskoðenda til þess umhverfis sem mótar starf þeirra með sérstakri áherslu á siðareglur.Ritgerðin fjallar um siðfræði ásamt almennri umfjöllun um siðareglur með sérstakri áherslu á siðareglur Félags löggiltra endurskoðenda (FLE). Til samanburðar eru skoðaðar siðareglur lækna, lögfræðinga og sálfræðinga. Einnig er fjallað um starf endurskoðandans, hlutverk hans og ábyrgð. Teknar eru saman þær faglegu kröfur sem gerðar eru til endurskoðenda og ítarlega fjallað um endurmenntun. Starfsumhverfi og starfsvettvangur endurskoðenda er kannaður ásamt helstu lögum og reglum sem stýra starfi hans. Niðurstöður rannsóknarinnar leiddu í ljós að endurskoðendur eru almennt séð jákvæðir í garð siðareglnanna. Endurskoðendur þurfa að vera sýnilegri og nauðsynlegt er að kynna starf og mikilvægi stéttarinnar fyrir samfélagið. Einnig þarf að auka eftirlit með útboðsmálum og herða viðurlög við hvers kyns brotum sem skaða orðspor starfsstéttarinnar og draga úr virðingu og trausti sem er starfi endurskoðenda nauðsynlegt.