Þú ert það sem þú borðar. Matvælaiðnaður á tímum hnattvæðingar og nýjar félagslegar hreyfingar með áherslu á mat

Abstract

Megintilgangur þessarar ritgerðar er að fjalla um matvælaframleiðslu, dreifingu og neyslu í nokkuð stóru og víðfeðmu samhengi. Ritgerðinni er skipt upp í tvo hluta sem þó tengjast óneitanlega, annars vegar framleiðslu og dreifingu matvæla og hins vegar neyslu og siðferðisvitund neytenda. Í fyrri hluta ritgerðarinnar er fjallað um matvælaiðnaðinn í kjölfar nýrrar landbúnaðartækni, hnattvæðingar og aukinnar samþættingar fjölþjóðlegra fyrirtækja. Afleiðingar þess eru skoðaðar út frá ýmsum sjónarhornum allt frá fjölgun stórfyrirtækja á kostnað smábýla og áhrif þess á staðbundna markaði, til umhverfis- og heilsufarsvandamála sem óneitanlega hafa látið á sér kræla í kjölfar þessara breytinga. Þar er meðal annars fjallað um notkun varnarefna, erfðabreytt matvæli, einsleitni fæðutegunda, unnin matvæli og breytt næringarástand fólks á tímum lífstílssjúkdóma á borð við offitu. Í síðari hluta ritgerðarinnar er fjallað um pólitíska neyslu í kjölfar aukinnar siðferðisvitundar á meðal neytenda í tengslum við mat. Kynntar verða eldri og nýrri matvælahreyfingar á borð við heilsufæðishreyfinguna, grænmetisætur, sanngjörn viðskipti, freegan hreyfinguna, staðbundna framleiðslu auk annarra nýrra hreyfinga sem allar eiga það sameiginlegt að vera gagnrýni á nútíma framleiðslu og dreifingu matvæla hver á sinn hátt.