Stakkaskipti: Hafði kvennabaráttan áhrif á klæðaburð fólks?

Abstract

Fatnaður, kynjahugmyndir og áhrif kvenréttindabaráttunnar á klæðaburð fólks er viðfangsefni þessarar ritgerðar. Tekin eru fyrir tvö tímabil þar sem fatnaður karla og kvenna er skoðaður. Annars vegar er það aldamótakynslóðin um 1900 og hins vegar ´68 kynslóðin í kringum 1970. Í báðum tilfellum er sjónum beint að unga fólkinu sem gerði uppreisn gegn gildum foreldra sinna og á báðum tímabilunum náði kvennahreyfingin áfangasigrum í jafnréttisbaráttunni, fyrst með kvenréttindum og síðar kynfrelsi. Þessi tímabil eru jafnan kennd við fyrstu og aðra bylgju feminismans. Sjálfsmynd unga fólksins á hvorum tíma er síðan borin saman með kenningar um hópa, veruhátt og alsæi í huga. Helstu niðurstöður eru þær að á fyrra tímabilinu sáust einkum breytingar á klæðaburði kvenna í átt til frjálsræðis og sjálfstæðis en klæðaburður karla var nokkurn veginn óbreyttur, þá var mikill munur á fatnaði kynjanna. Á síðara tímabilinu eru greinileg áhrif í átt til kynleysis eða samkyns þar sem lítill greinamunur var gerður á kven- og karlmannafatnaði. Þá voru einnig róttækar kenningar um kyngervi þar sem eldri kenningum um eðli kynjanna var hafnað.