Áhrif spunaaðferða Mike Leigh á Gullregn Ragnars Bragasonar

Abstract

Mike Leigh er breskur leikari, höfundur og leikstjóri fæddur í Lancashire á Englandi árið 1943. Leigh lagði stund á leiklist í fyrstu hjá Konunglegu leiklistarakademíunni í London en hafði í raun aldrei í huga að leggja stund á leiklist. „Ég vildi gerast kvikmyndaleikstjóri,“ er haft eftir honum „en ég taldi það hollt að komast að því um hvað leikurinn snérist.“3 Kvikmyndaverk Leigh: Vera Drake, Secrets and lies, Happy-go-lucky, Another year og Topsy- turvy hafa öll verið tilnefnd til óskarsverðlauna í flokknum besta handrit en ólíkt öðrum höfundum sem sitja við vinnuborðið með blað og penna kýs hann að líta á vinnurýmið sem sitt blað og leikarann sem sinn penna.4 Fyrir utan kvikmyndir sínar og sjónvarpsverk hefur Leigh verið ábyrgur fyrir yfir 30 leikritum á síðustu 10 árum.5 Listaverk Leigh takast á við breskan veruleika og einkennast af einföldum söguþræði og skarta ákaflega litríkum persónum sem búa yfir kristaltærri hugsun. Karaktersköpunin með leikaranum er gríðarlega stór þáttur í allri vinnu Leigh. Ragnar Bragason lýsir upplifun sinni á karaktersköpun Leigh á eftirfarandi hátt „Þegar ég horfi á myndir eftir Leigh líður mér eins og ég sjái toppinn á ísjakanum en ég finn fyrir öllum klakanum. Eftir að ég sá Naked áttaði ég mig á því að svo að toppurinn verði áhugaverður þá verð ég að skapa allan klakann.“