„Það er bara andlegt og líkamlegt meðal að fara í sund.“ Upplifun sundgesta af laugarferðum og samanburður á einka- og almenningslaugum

Abstract

Ritgerðin fjallar um sundlaugamenningu á Íslandi þar sem sérstaklega er litið til þess hver sé helsti munurinn á einkalaugum og almenningslaugum. Rannsóknarspurning ritgerðarinnar er hver sé helsti munur á almennings- og einkalaugum og hvort fólk sækist eftir sömu upplifun og fari í sama tilgangi í almenningslaugar og í einkalaugar. Til að leita svara við spurningunni voru tekin tvö viðtöl við fastagesti almenningslauga og tvö við fastagesti einkalauga. Einnig var gerð þátttökuathugun í hvoru tveggja einka- og almenningslaug. Auk viðtala og vettvangsnótna var stuðst við greinar og bækur sem gefnar hafa verið út um sundiðkun, bæði innlendar og erlendar. Farið var yfir nokkra þætti sem tengjast sundi og laugum og þeir greindir eftir því hvort farið væri í einka- eða almenningslaug. Þessir þættir voru: andinn í lauginni, óskráðar og skráðar reglur sem gilda í lauginni, laugin sem samkomustaður, sundfólkið og siðir þess, afslöppun og hreyfing í lauginni. Niðurstöður rannsóknarinnar sýna að munurinn á einkalaugum og almenningslaugum byggir meðal annars á ólíkum hópum sem sækja laugarnar, þar sem fjöldi fólksins og tenging þeirra á milli er breytileg. Hóparnir hafa svo áhrif á flesta þætti sem snerta sundið svo sem félagslega virkni, anda lauganna, skráðar og óskráðar reglur og afslöppun í pottinum.