Takmarkanir á rétti aðila til að semja ágreining undan úrlausn almennra dómstóla

Abstract

Einn mikilvægasti grundvöllur allra viðskipta er meginreglan um samningsfrelsi aðila. Í ritgerðinni eru könnuð mörk réttar samningsaðila til að takmarka stjórnarskrárverndaðan aðgang sinn að almennum dómstólum.Fyrst er stuttlega fjallað um meginreglur samningaréttar og hvað sé fólgið í samningsfrelsinu. Næst er skoðaður réttur aðila til að bera ágreining undir dómstóla og síðan ákvæði laga nr. 91/1991, um meðferð einkamála, sem heimilar að sakarefni sé undanskilið lögsögu dómstóla með samningi. Í því samhengi er jafnframt fjallað um heimildir til að vísa málum til gerðardóma og til að leysa þau utan dómstóla. Síðan eru reifaðir hæstaréttardómar, þar sem reynt hefur á umfjöllunarefni ritgerðarinnar, og að lokum eru niðurstöður teknar saman.Í ritgerðinni er leitast við að draga fram þær réttarreglur sem staðfesta eða takmarka framangreint frelsi, eða á einhvern hátt hafa áhrif á túlkun slíkra reglna.