Áhugahvöt unglinga í fótbolta

Abstract

Rannsókn þessi kannar áhugahvöt meðal ungmenna í þriðja og fjórða flokki í knattspyrnu. Meginmarkmið rannsóknarinnar var að komast að því hverjar helstu áhugahvatir fyrir knattspyrnuiðkun eru á meðal 12-16 ára unglinga, einnig er markmið rannsóknarinnar að kanna hvort munur sé á áhugahvöt drengja og stúlkna sem stunda fótbolta og eins að athuga hvort áhugahvötin breytist eftir aldri. Við rannsóknina var notast við þýdda útgáfu af ,,Participation motivation questionnaire” spurningarlistanum. Rannsóknin leiddi í ljós hvaða þættir eru mikilvægir varðandi þátttöku ungmenna í knattspyrnu. Þátttakendur í rannsókninni voru 214 ungmenni á aldursbilinu 12-16 ára. Tilgátur sem settar voru fram voru þrjár. Sú fyrsta var að stúlkum þyki félagsskapur mikilvægari þáttur í knattspyrnuiðkun en drengjum. Önnur var sú að stúlkum þyki mikilvægara að halda sér í formi en drengjum. Þriðja var að drengir hafi meiri metnað til að ná árangri en stúlkur. Engin af þremur tilgátum stóðst. Megináhugahvatir unglinga í fótbolta meðal þátttakenda í þessari rannsókn voru metnaður til að ná árangri og að halda sér í formi.