Nýtt undir nálinni í smíðastofunni : vínylplötur sem efniviður í hönnun og smíði

Abstract

Viðfangsefni þetta er lokaverkefni til B.Ed.- prófs í grunnskólakennarafræðum við Menntavísindasvið Háskóla Íslands. Það inniheldur bæði greinargerð og verkefnasafn. Verkefnasafnið byggir á hagnýtingu vínylplatna sem efniviðar við verkefnagerð í námsgreininni hönnun og smíði. Verkefnasafnið byggir á efnislegum tilraunum höfundar og vettvangsnámi þar sem hann gerði tilraunir í kennslu. Einstökum verkefnum verkefnasafnsins er ætlað að nýtast á mismunandi aldursstigum grunnskólans og mætti einnig nota sem grunn að undirstöðu valáfanga fyrir hönnun og smíði fyrir unglingastig grunnskóla. Á þessu aldursstigi eiga nemendur að hafa kynnst og unnið með algeng efni í umhverfi sínu eins og við og málm. Notkun vínylplatnanna er því nýr þáttur sem byggir ofan á fyrri reynslu þeirra. Mikilvægt er að nemendur grunnskólans öðlist þekkingu á efnisflokkum og tegundum í umhverfi sínu og geti nýtt í hönnun og smíði verkefna sinna. Það eykur læsi þeirra á umhverfi sitt og möguleika þeirra til þátttöku í mótun þess.Í greinargerðinni er í stuttu máli fjallað um námsgreinina hönnun og smíði, síðan er fjallað um sögu vínylplötunnar og stöðu hennar í nútíma samfélagi. Að lokum er fjallað um verkefnasafnið og notkun þess í skólastarfi. Annar hluti lokaverkefnis höfundar inniheldur verkefnasafn. Í verkefnasafninu eru níu mismunandi verkefni með verkefnalýsingum, þar sem lögð er áhersla á notkun vínylplatna, sem efniviðar fyrir gerð verkefna í hönnun og smíði. Þó að verkefnin séu einföld að grunni eru gerðar kröfur til nemenda um útlits- og formhönnun þeirra. Í báðum hlutum lokaverkefnisins er undirbúningi kennslu lýst og framkvæmd verkefnanna gerð skil.