Umfjöllun fjölmiðla um fangelsismál 2004 til 2012

Abstract

Meginmarkmið þessarar rannsóknar var að kanna umfjöllun Fréttablaðsins og Morgunblaðsins um fangelsismál á árunum 2004 til 2012. Unnið var við ritgerð þessa á tímabilinu september til desember árið 2013 og er hún 12 eininga lokaverkefni við Háskóla Íslands í félagsráðgjöf. Greindar voru 866 greinar í blöðunum tveimur úr gagnasafni tímarit.is og mbl.is. Leitast var eftir að svara eftirfarandi rannsóknarspurningum: Hefur umfjöllun fjölmiðla um fangelsismál breyst eftir efnahagshrunið? Hvað er helst fjallað um í fjölmiðlunum tveimur um fangelsismál? Er munur á umfjöllun Morgunblaðsins og Fréttablaðsins? Er umfjöllunin jákvæð, neikvæð eða hlutlaus? Rannsóknaraðferðin var megindleg og eigindleg ásamt innihaldsgreiningu á umfjöllun fjölmiðlana. Gerð verður grein fyrir fangelsismálum á Íslandi, starfi félagsráðgjafans innan réttarvörslukerfisins og áhrifum fjölmiðla á viðhorf almennings. Helstu niðurstöður gefa það til kynna að umfjöllun fjölmiðlana hefur ekki mikið breyst eftir efnahagshrunið ásamt því að lítill munur var á umfjöllun blaðanna. Helst var fjallað um þörf á nýju fangelsi, aðgerðir og aðgerðarleysi stjórnvalda í fangelsismálum, úrræði og aðbúnað fanga ásamt aðbúnaði fanga í gæsluvarðhaldi. Á heildina litið var umfjöllun frekar neikvæð heldur en jákvæð.