Vinnu- og vöruferlar á varahlutalager ITS og hermilíkan í tölvu

Abstract

Þetta verkefni er unnið í tengslum við varahlutalager ITS. Reksturinn hefur aukist gríðarlega undanfarin ár og hefur haft mikil áhrif á starfsemi lagersins. Biðraðir eða flöskuhálsar við vinnustöðvar eru þar þekkt vandamál. Megin tilgangur þessa verkefnis er að skoða vinnu- og vöruferla á lagernum, finna biðraðir og setja mælikvarða. Markmiðið er að finna álagspunkta svo auðveldara verði að stýra vöruflæði og mannafla. Hermilíkan verður sett upp í tölvu og skoðað verður hvort hægt sé að líkja eftir raunverulegu vöruflæði lagersins.Eftir vinnslu þessa verkefnis liggur fyrir þó nokkuð af upplýsingum um vöruflæði lagersins. Eftir skoðun á vinnustöðvum og samtölum við starfsfólk fékkst góð lýsing á vöruflæði og vinnuferlum. Önnur gögn sem notuð voru í þessu verkefni fengust úr tölvukerfi ITS, stoð-tölvukerfi innkaupadeildar og við tímamælingar á afgreiðslutíma á völdum vinnustöðvum. Þessi gögn eru ekki fullkomlega áræðanleg en gefa góðar vísbendingar um flöskuhálsana. Mælikvarðar á biðröðum og vinnustöðvum voru fundnir, ásættanlegur biðtími var ákveðinn og frávik síðan mæld. Athugavert er að ásættanlegur biðtími náðist ekki í neinu mælanlegu tilfelli.Samkvæmt niðurstöðum verkefnisins á að leggja áherslu á innkomu varahlutana inn á lager. Móttaka (Receiving), samþykki (Acceptance) og staðsetning á SE lager. Eftir að hafa keyrt hermilíkanið með ásættanlegum biðtíma þá voru ennþá biðraðir á þessum vinnustöðvum.