Hönnun trefjastyrktra- og hefðbundinna platna á fyllingu

Abstract

Í þessu verkefni hefur verið skoðaður sá möguleiki hvort raunhæft sé að nota trefjastyrktar plötur á fyllingu í stað hinnar hefðbundnu járnbentu plötu sem mikil hefð hefur skapast fyrir að nota. Tekin eru til umfjöllunar möguleg álagstilfelli sem verka á yfirborð platna og hentugar reikniaðferðir til að meta burðarhæfni þeirra. Einnig hafa verið skoðaðir efniseiginleikar þeirra byggingarefna sem hér hafa verið nefnd. Í verkefninu er tekin fyrir ein reikniaðferð sem notast var við til að sýna fram á burðarhæfni steyptrar plötu á fyllingu gagnvart punktálagi. Helstu niðurstöður verkefnisins eru þær að sá möguleiki er fyrir hendi að nota trefjastyrkta steinsteypu í stað hinnar hefðbundnu plötu sem styrkt er með samhangandi járnagrind þar sem það á við. Þó getur framkvæmdarkostnaður trefjastyrktra platna verið mun meiri og fyrir verða að liggja upplýsingar um þau áhrif sem trefjarnar hafa á burðarhæfni steinsteypu.