Uppgjörsmismunur á afgreiðslukössum. Hvað er til ráða?

Abstract

Í þessu verkefni er kynnt hvað uppgjörsmismunur á afgreiðslukössum hjá verslunarfyrirtækjum er. Vinnuferli starfsmanna á afgreiðslukössum er lýst í grófum dráttum. Einnig er tekið fyrir hvaða lagalega hlið tengist uppgjörsmismun á afgreiðslukössum. Til að fá skýrari mynd á uppgjörsmismun var framkvæmd raundæmisrannsókn. Markmið rannsóknarinnar var að greina undirliggjandi orsakaþætti á uppgjörsmismun. Þekking yfirmanna á afgreiðslukössum á uppgjörsmismun var skoðuð. Einnig var litið til þess hvort hægt væri að lágmarka þennan mismun.Rannsóknin var gerð í samstarfi við stórt verslunarfyrirtæki. Fyrirtækið sem rannsakandi hafði samband við rekur margar verslanir og hefur fjölda afgreiðslustöðva. Fjöldi afgreiðslustöðva var mikilvægur til að fá betri heildarmynd. Raundæmisrannsóknin var byggð á fyrirliggjandi gögnum frá samstarfsfyrirtæki og viðtölum sem tekin voru við yfirmenn í fimm af verslunum þess.Niðurstöður leiddu í ljós að þekking yfirmanna á orsakaþáttum uppgjörsmismunar í þessum fimm verslunum er ekki næg. Starfsmenn á afgreiðslukössum eru ekki fræddir um uppgjörsmismun þegar þeir hefja störf, einungis ef þess er talið þörf. Hægt væri að lágmarka uppgjörsmismun hjá fyrirtækinu með betri fræðslu, bæði til yfirmanna sem og starfsmanna, og markvissri eftirfylgni. Einnig er lögð fram tillaga að breytingu við vinnu á uppgjöri í verslunum fyrirtækisins. Það er, að allir peningar sem skilað er inn frá uppgjörstösku starfsmanns skráist í uppgjör hans. Þar sem núverandi vinnuaðferð, að skrá ekki skiptimynt í uppgjör, sýnir ekki raun uppgjörsmismun hjá afgreiðslumönnum.