Bragi segir (sjálf)sögur: Söguheimur þriggja skáldsagna Braga Ólafssonar

Abstract

Í þessari ritgerð verður fjallað um þrjár skáldsögur eftir Braga Ólafsson. Þær eru Sendiherrann (2006), Handritið að kvikmynd Arnar Featherby og Jóns Magnússonar um uppnámið á veitingahúsinu eftir Jenný Alexson (2010) og Fjarveran (2012), þá verður komið stuttlega inn á útvarpsleikritið Gestabókin og tengsl síðastnefndu skáldsögunnar við Gæludýrin (2001), aðra bók Braga. Ástæða þess að þessar þrjár skáldsögur (og útvarpsleikrit) eru til umfjöllunar er sameiginlegur söguheimur verkanna. Sendiherrann fjallar um ljóðskáldið Sturlu Jón, Handritið að kvikmynd Arnar Featherby og Jóns Magnússonar um uppnámið á veitingahúsinu eftir Jenný Alexson fjallar um Örn og Jón. Örn vill skrifa og Jón er lærður leikstjóri. Fjarveran fjallar um prófarkalesarann Ármann Val, sem langar til að skrifa. Skáldskapur er umfjöllunarefni bókanna þriggja, söguheimsins. Í ritgerðinni verður litið á hvernig fjallað er um skáldskap og tengsl hans við söguheiminn og öfugt.Allar aðalpersónur bókanna tengjast skáldskap. Jenný Alexson skrifar meira að segja eina þeirra eins og segir í nafni bókarinnar. Skáldskapur er alltumlykjandi í verkunum þremur og það kemur fram á ýmsa vegu. Hér verður litið sérstaklega á þrjá: Vísanir, ýmiss konar vísanir (í önnur verk, í eigin verk, í gerð verksins), frásagnaspegla, verk inni í verkum (það birtast verk inni í öllum þrem bókunum) og söguheimin sjálfann, persónugallerýið sérstaklega.