Hávaðamengun í leikskólastarfi

Abstract

Verkefni þetta er unnið sem lokaverkefni til B.Ed. gráðu í leikskólafræði við Kennaraháskóla Íslands á vorönn 2008. Í verkefninu er sjónum beint að hávaðamengun í leikskólastarfi, hvað henni veldur, hvaða áhrif hávaðinn hefur á bæði börn og starfsfólk og að lokum hvaða leiðir hægt er að fara til þess að draga úr hávaða í leikskólastarfi án þess að draga úr sjálfræði og lýðræði barnahópsins. Fjallað er um eyrað og heyrnina og hvaða áhrif hávaði hefur á heyrn barna og fullorðinna. Fjallað er um hávaða í leikskólastarfi og mismunandi starfsaðferðir með tilliti til hávaða. Ljóst er að starfsaðferðir sem einkennast af ströngum aga leiða af sér minni hávaða og fjallað er um hvers vegna þess háttar starfsaðferðir henta illa uppvexti barnsins. Fjallað er um sjálfræði og lýðræðislegt uppeldisstarf í leikskóla og hver ávinningur leikskólastarfs sem byggir á lýðræðislegum starfsháttum og sjálfræði barna er. Sett eru fram úrræði við hávaða í leikskólastarfi og er þá horft til húsbúnaðar leikskóladeildar, starfsaðferða starfsfólks og skipulags leikskólastarfsins. Að lokum er sagt frá þróunarverkefni sem unnið var á leikskólanum Vallarseli á Akranesi veturinn 2008, þar sem þróaðar voru aðferðir til þess að draga úr hávaða í leikskólastarfi. Sagt er frá ferli verkefnavinnunnar og þeim árangri sem verkefnavinnan leiddi af sér.Lykilorð: Leikskólastarf.