Æðri máttur

Abstract

Þessi greinargerð er hluti af lokaverkefni til B.Ed. gráðu við Menntavísindasvið Háskóla Íslands. Lokaverkefni okkar var að útbúa kennslubók fyrir 4. bekk grunnskóla ásamt kennsluleiðbeiningum sem innihalda hugmyndir að fjölbreyttum og skapandi verkefnum. Bókin er hugsuð sem tenging á milli yngsta stigs og miðstigs grunnskólanna. Tilgangur verkefnisins er að kynna fyrir nemendum megineinkenni helstu trúarbragða heimsins ásamt því að auka þekkingu þeirra á nokkrum helstu trúarbrögðum sem iðkuð eru í heiminum í dag. Við teljum mikilvægt að allir þekki sem flest trúarbrögð, siði og venjur til þess að komast hjá fordómum sem oft má rekja til vanþekkingar. Með bókinni fylgja kennsluleiðbeiningar en í þeim má finna hugmyndir að skemmtilegum verkefnum sem kennari getur stuðst við og vakið áhuga nemanda. Við gerð námsbókarinnar og kennsluleiðbeininganna var fjölgreindarkenning Howard Gardners höfð að leiðarljósi ásamt flokkun kennsluaðferða eftir Ingvar Sigurgeirsson. Uppbygging bókarinnar er þannig að aðalsögupersónan er tíu ára gömul stúlka sem ferðast um heiminn með fjölskyldu sinni til þess að kynna sér helstu trúarbrögð og menningu heims. Hún segir frá fimm helstu trúarbrögðum heims ásamt hinni norrænu ásatrú. Hún kynnir lesendum fyrir helstu guðum trúarbragðanna ásamt tilbeiðslu þeirra, athöfnum, frídögum, hátíðum, helgiritum, guðshúsum ásamt fleiru sem tilheyrir hverri trú fyrir sig. Í lok hvers kafla vörpum við fram spurningum sem nemendur geta leyst til þess að festa efnið betur í minni eða sem kennarar geta notast við til að skapa umræður um efnið. Við teljum að með þessari bók fái nemendur grunnþekkingu á trúarbrögðum heimsins sem gæti nýst þeim til að skilja undirstöðu menningu hinna ýmsu landa.