Skynjun ferðamanna á Íslandi: Mikilvægi mannfræðinnar

Abstract

Þessi ritgerð fjallar um skynræna mannfræði og hvernig hún getur komið að gagni við að skilja hvernig ferðamenn skynja umhverfið á nýjum stað og hvernig slík þekking getur gagnast aðilum ferðaþjónustunnar við stefnumótun sem og til þess að veita sem besta þjónustu. Í upphafi er staðan í íslenskri ferðaþjónustu skoðuð til að veita viðfangsefninu hagnýtan ramma en því næst er litið á eðli skynjana sem og einstök skynfæri auk helstu kenninga í sögu skynrænnar mannfræði til að varpa ljósi á ólíkar fræðilegar nálganir á þessu sviði. Í síðasta kaflanum er svo farið út í að skoða skynjun sem eina heild þar sem kenningarsmiðir fyrirbærafræðinnar leika stórt hlutverk og hugmyndir þeirra um náttúrulega beina tengingu okkar við umhverfið og skynjanir okkar. Að lokum kemur það niður á næmni mannfræðinnar fyrir fjölbreytileikanum og eðli skynjana til að veita ferðaþjónustunni innsýn í upplifun síns markhóps.