Fjölskyldustefna: Námsmaður og launamaður - samanburður

Abstract

Íslensk fjölskyldustefna hefur tekið miklum breytingum síðustu áratugi og hafa málefni fjölskyldunnar þróast til betri vegar. Þrátt fyrir jákvæða þróun á málefnum fjölskyldunnar má ýmislegt bæta. Íslenskar fjölskyldur njóta ákveðins stuðnings í formi bóta og þjónustu velferðarkerfisins en ýmsar lagabreytingar síðustu ára hafa aukið rétt foreldra og barna. Aðsókn námsmanna í háskólanám hér á landi er mikil og til að mynda hefur hlutfall kvenna sem stunda háskólanám farið vaxandi og algengt er að fjölskyldufólk stundi háskólanám. Háskólanámi getur fylgt mikið álag og ef álagið er mikið eru líkur á að nám geti reynst foreldrum of erfitt. Með því að námsmenn njóti góðs fjárstuðnings má telja að álag við nám minnki töluvert og geta námsmenn betur einbeitt sér að náminu sjálfu. Námsmenn með börn á framfæri njóta ákveðins fjárstuðnings en velta má því fyrir sér hvort munur sé á fjárstuðningi við námsmenn annars vegar og launamenn hins vegar. Í ritgerð þessari er gerður samanburður á þessu tvennu og sýnir sá samanburður fram á að fjárstuðningur til námsmanna er meiri en til launamanna. Í ritgerð þessari er einnig skoðað hvort munur sé á fjárstuðningi við einstæða foreldra í háskólanámi annars vegar og við foreldri í sambúð í háskólanámi hins vegar. Mikilvægt er, að mati höfundar, að veita námsmönnum með börn á framfæri nægan fjárhagsstuðning þar sem álag í námi er töluvert og ef námsmenn þurfa einnig að hafa áhyggjur af fjárhagnum getur álagið orðið þeim ofviða. Ritgerðin er heimildaritgerð. Við heimildasöfnun var notast við fyrirliggjandi gögn, rannsóknir, skýrslur og fræðigreinar um efnið. Efnisorð: fjölskyldustefna, námsmenn, launamenn, framfærsla, fjárstuðningur, velferð, háskólanám, Háskóli Íslands.