Gengur afstaða Íslendinga í berhögg við ríkjandi refsipólitík?

Abstract

Áhyggjur af afbrotum og hvernig bregðast skal við vandanum eru áberandi í samfélaginu. Í lýðræðissamfélagi er mikilvægt að víðtæk sátt ríki um réttarkerfið og löggjöfina. Mælingar á viðhorfum borgaranna eru því áhugaverðar fyrir margra hluta sakir. Mælingar á afstöðu Íslendinga til ýmissa álitaefna er tengjast afbrotum hafa reglulega verið framkvæmdar í samvinnu við Félagsvísindastofnun Háskóla Íslands á síðustu árum. Í erindinu verður greint frá niðurstöðum nýjustu mælingarinnar sem framkvæmd var á vordögum 2014. Einkum verður lögð áhersla á að skoða afstöðu Íslendinga til nokkurra hitamála í íslensku samfélagi á síðustu misserum. Á að heimila lögreglu að bera skotvopn við skyldustörf sín? Á að rýmka heimildir lögreglu til að rannsaka alvarleg sakamál og er notkun tálbeita réttlætanleg? Eiga vændiskaup að vera refsiverð? Vilja Íslendingar lögleiða kannabis eða er stuðningur við að varsla á fíkniefnum til einkanota verði gerð refsilaus?