Taugaefling heilbrigðra einstaklinga. Samtal hagsmunaaðila og almennings

Abstract

Markmið rannsókna á heila- og taugakerfi miða flestar að því að auka færni og getu manneskjunnar. Í sumum tilfellum er verið að bæta skaða sem sjúkdómar valda, eins og Parkinson, eða draga út einkennum taugaþroskaröskunar eins og ADHD, en í öðrum tilfellum er stefnt að því að efla getu heilbrigðra einstaklinga, líkt og þegar nemendur sækja í lyf til að efla minni. Siðfræðistofnun er þátttakandi í evrópska rannsóknaverkefninu NERRI (Neurological enhancement, responsible research and innovation). Markmið verkefnisins er að rannsaka, kynna, og benda á leiðir til úrbóta þegar kemur að siðferðilegum álitaefnum í tengslum við taugaeflingu (neurological enhancement). Taugaefling er hér skilgreind sem hvaðeina sem eykur getu og virkni miðtaugakerfis og heila. Mikilvægur þáttur í rannsókninni er að efna til samtals við almenning og fagaðila um siðferðileg álitamál sem tengjast rannsóknum og notkun á taugabótum (neurological enhancement). Í framhaldi af þessu samtali verða síðan gerðar tillögur að siðareglum er lúta að rannsóknum á þessu sviði. Í erindinu verða kynntar áfanganiðurstöður verkefnisins, meðal annars niðurstöður viðtalsrannsóknar við hagsmunaaðila á sviðinu. Þá verða greindar þær siðferðilegu spurningar sem vakna meðal hagsmunaaðila og velt upp hvaða lærdóm megi draga af þeim viðhorfum sem þar koma fram.