Lögbundnar takmarkanir á veðsetningu fasteigna. Tillögur sérfræðingahóps Forsætisráðuneytisins um takmarkanir á veðsetningu íbúðarhúsnæðis vegna verðtryggðra íbúðalána

Abstract

Í íslenskri löggjöf er að finna ýmis lagaákvæði sem takmarka heimild eiganda til að ráðstafa eignum sínum með tilteknum hætti. Í þessari ritgerð verða skoðaðar helstu lögbundnu takmarkanir á veðsetningu fasteigna. Útfærsla lagaákvæða um slíkar takmarkanir er ólík eftir hvaða rök eða sjónarmið löggjafinn hefur haft við setningu þeirra. Markmið þessarar ritgerðar er að bera kennsl á helstu núgildandi takmarkanir sem á reynir í íslenskri löggjöf og hvernig þeim er háttað í samræmi við þau sjónarmið sem liggja þar að baki. Í framhaldi af því verður reynt að varpa ljósi á þá þætti sem lagaákvæðin eiga sameiginlegt. Því næst verður fjallað um þær tillögur sem settar voru fram í skýrslu sérfræðingahóps, sem skipaður var af Forsætisráðherra í ágúst 2013, um afnám verðtryggingar á nýjum neytendalánum. Fjallað verður um þær tillögur sem hópurinn lagði til sem snerta takmarkanir á veðsetningu íbúðarhúsnæðis. Tekin verður afstaða til hvort hún eigi sameiginlega efnisþætti með þeim lagaákvæðum sem verða tekin til skoðunar, eða hvort hún feli í sér nýjungar sem varða takmarkanir á veðsetningum.