Rannsóknir á erfðamengi mannsins. Norrænt HUGO verkefni

Abstract

HUGO (Human Genome Organization) er alþjóðlegt samvinnuverkefni um könnun á erfðamengi mannsins og er tilgangur þess að einangra og kortleggja gen. Þegar er búið að einangra um það bil 1% af þeim 100.000 genum sem talin eru vera í erfðamengi mannsins, þannig að miklu verki er enn ólokið. Gert er ráð fyrir að erfðaefnið verði raðgreint, þ.e. greining verði gerð á byggingareiningum erfðaefnisins. Tækninni fleygir fram og úrvinnsla á niðurstöðum raðgreininga og kortlagningu fer fram í mjög fullkomnu tölvukerfi. Á fyrstu árum HUGO-rannsókna hefur einkum verið unnið að úrbótum á tækni, svo sem við einangrun gena, kortlagningu og sjálfvirka raðgreiningu.