Vanefndir og vanefndaúrræði aðila leigusambands

Abstract

Eins og heiti ritgerðarinnar gefur til kynna fjallar hún um þær vanefndir og þau vanefndaúrræði sem aðilar leigusambands geta staðið frammi fyrir. Réttindi og skyldur aðila leigusambands eru margvísleg, en oft eru skyldur leigusala jafnframt réttindi leigutaka og öfugt. Þannig er ein af aðalskyldum leigutaka til dæmis að greiða hið umsamda leiguverð á réttum tíma og sömuleiðis eru einhver mikilvægustu réttindi leigusala tengd því að fá þá greiðslu í sínar hendur. Í upphafi ritgerðarinnar er fjallað um leiguumhverfið á Íslandi og sögu lagasetningar um húsaleigusamninga. Þá er einnig fjallað um þá aðila sem starfa hér á sviði húsaleigumála, bæði félagasamtök og opinbera aðila. Í kafla 3 er ítarlega fjallað um réttindi og skyldur bæði leigutaka og leigusala, en það er í flestum tilfellum undanfari vanefnda þegar aðilar brjóta gegn þessum skyldum sínum. Í kjölfarið af því er síðan fjallað ítarlega um vanefndir beggja aðila og þau vanefndaúrræði sem aðilar geta gripið til vegna vanefnda gagnaðila í köflum 4 og 5. Að lokum er síðan efni ritgerðarinnar tekið saman í kafla 6, en að auki fylgir viðauki með ritgerðinni þar sem fjallað er um þær breytingar sem til stendur að gera á húsaleigulögum á yfirstandandi þingi.