Vinsamlegast notið þetta auðkenni þegar þið vitnið til verksins eða tengið í það: http://hdl.handle.net/1946/20932
Ýmsar reglur gilda þegar lánardrottinn krefst þess að bú skuldara verði tekið til gjaldþrotaskipta og eru þessar reglur meginviðfangsefni þessarar ritgerðar. Ritgerðin er að mestu skrifuð frá sjónarhorni lánardrottins og tekið mið af þeim atriðum sem hann þarf að gæta að og þeim atriðum sem upp geta komið við og eftir gjaldþrotaskipti. Ekki verður fjallað ítarlega um þær formreglur sem gilda þegar lánardrottinn krefst gjaldþrotaskipta, en um þær hefur töluvert verið fjallað og er ekki miklu við þá umfjöllun að bæta. Hins vegar verður ítarlega fjallað um ýmsar efnis- og réttarfarsreglur sem í gildi eru þegar lánardrottinn krefst gjaldþrotaskipta á búi skuldara. Í því skyni verður velt upp ýmsum álitaefnum sem vakna í kjölfar gjaldþrotaskipta að kröfu lánardrottins.
Áður en hægt er að fara efnislega í þessi atriði þarf að byrja á því að ramma inn viðfangsefnið og er því í 2. kafla farið yfir fræðigreinina skuldaskilarétt, hugtakið fullnustugerðir og flokka þeirra og gert verður grein fyrir þeim greinarmun sem er á sérstökum og sameiginlegum fullnustugerðum. Einnig verður fjallað með ítarlegum hætti um fullnustugerðina gjaldþrotaskipti. Í 2. kafla verður einnig farið yfir þróun laga um gjaldþrotaskipti með sérstaka áherslu á gjaldþrotaskipti að kröfu lánardrottins.
Í 3. kafla verður fjallað um meðferð kröfu um gjaldþrotaskipti fyrir dómi. Nefndar verða í mjög stuttu máli þær formkröfur sem gerðar eru til beiðnar um gjaldþrotaskipti. Aðaláhersla 3. kafla verður á það þegar sú aðstaða er uppi að lánardrottinn krefst gjaldþrotaskipta á búi skuldara en útivist verður af hálfu þess síðarnefnda. Í lok kaflans verða einnig kannaðar heimildir skuldara og lánardrottins til að afturkalla kröfu um gjaldþrotaskipti.
Í 4. kafla, sem er þungamiðja ritgerðarinnar, er fjallað um gjaldþrotaskipti að kröfu lánardrottins og ýmis skilyrði 65. gr. gþl. Sérstaklega verður fjallað um 5. tölul. 2. mgr. 65. gr. gþl. þar sem um nýmæli er að ræða sem ekki hefur verið fjallað um sérstaklega áður svo höfundur viti til. Allir dómar Hæstaréttar sem fallið hafa um 5. tölul. 2. mgr. 65. gr. gþl. verða teknir fyrir og þeir kannaðir og rannsakaðir sérstaklega. Af þeim verða dregnar ýmsar ályktanir sem gert verður grein fyrir og jafnframt verður gert grein fyrir fyrirhuguðum breytingum á 5. tölul. 2. mgr. 65. gr. gþl. og mögulegum ástæðum sem liggja að baki þessum breytingum. Einnig verður gerð grein fyrir 1.-4. tölul. 2. mgr. 65. gr. gþl. en þó ekki með jafn ítarlegum hætti þar sem um þá hefur verið fjallað að nokkru leyti á síðustu árum. Nefndir verða grundvallardómar í þeim efnum, en einnig verða nefndir nýlegir dómar Hæstaréttar sem fallið hafa allra á síðustu árum er taka til þessara töluliða. Í 4. kafla verður jafnframt fjallað um hvort möguleiki sé fyrir lánardrottinn að leggja fram önnur gögn en þau sem kveðið er á um í 2. mgr. 65. gr. gþl. þegar krafist er gjaldþrotaskipta og dregin verður ályktun um það hvort meginreglan um frjálst sönnunarmat dómara gildi þegar dómari metur hvort skuldari sé ógjaldfær. Eftir að umfjöllun um 2. mgr. 65. gr. gþl. er lokið verður 1. mgr. sömu greinar könnuð, en sú umfjöllun kemur í kjölfar umfjöllun um 2. mgr. greinarinnar þar sem höfundi þótti ástæða til að kanna hvort enn væri þörf fyrir ákvæði 1. mgr. 65. gr. gþl. eftir þær breytingar sem gerðar hafa verið á 2. mgr. 65. gr. gþl. Í lok 4. kafla verður fjallað um neikvæð skilyrði gjaldþrotaskipta með nokkuð ítarlegum hætti og á það sama við um dóma er taka til þeirra skilyrða, en nefndir verða grundvallardómar sem og um nýlegir dómar Hæstaréttar. Við ritun 4. kafla var höfð hliðsjón af norrænum rétti, þá einna helst dönskum rétti en einnig þeim norska og að einhverju leyti af sænskum rétti.
Í 5. kafla er fjallað um nýlegar breytingar gþl. á reglum um fyrningu og með hvaða hætti lánardrottinn þarf að fylgja kröfum sínum eftir svo þær renni ekki úr höndum hans og fyrnist. Farið verður í almenn atriði er varða fyrningu og því næst fyrningarreglur gþl. og breytingar sem gerðar voru með lögum nr. 142/2010. Kannaðir verða þeir dómar Hæstaréttar sem fallið hafa um 165. gr. gþl. eftir að henni var breytt með fyrrgreindum lögum. Einnig verða nefnd nokkur álitaefni sem líta ber til varðandi lagabreytingu nr. 142/2010 og jafnframt verða raktar efnisreglur nokkra erlendra ríkja sem taka til fyrningu krafna eftir gjaldþrotaskipti. Í lok kaflans mun höfundur setja fram ýmsar almennar hugleiðingar varðandi lög nr. 142/2010.
Heildarmarkmið ritgerðinnar er því að kanna með heildrænum hætti réttarfars- og efnisleg skilyrði gjaldþrotaskipta, sem og afleiðingar og réttaráhrif gjaldþrotaskipta. Byggir þessi könnun að mestu á sjónarhorni lánardrottins og er sérstaklega horft til þess þegar lánardrottinn krefst gjaldþrotaskipta á búi skuldara.
Lykilorð: Gjaldþrotaskipti, Einkamálréttarfar
Skráarnafn | Stærð | Aðgangur | Lýsing | Skráartegund | |
---|---|---|---|---|---|
Ritgerð.pdf | 778.94 kB | Lokaður til...04.05.2025 | Meginmál | ||
forsida_titilsida.pdf | 150.58 kB | Lokaður til...04.05.2025 | Titilsíða |