Tilkynningar frá leikskólum til barnaverndarnefnda. Áhrif fræðslu á tilkynningar

Abstract

Markmið rannsóknarinnar var að fá mynd af tilkynningum leikskólastarfsmanna til barnaverndarnefnda í Hafnarfirði og á Austfjörðum. Voru þeir spurðir út í þekkingu á verndandi þáttum í barnavernd, það er tilkynningarskyldu þeirra sem starfa með börnum og almennings auk þekkingar á hlutverki og starfsemi barnaverndarnefndar. Eins var leitast við að ná fram upplifun starfsmanna á eigin þekkingu á ofbeldi og vanrækslu og hvort þeir upplifðu sig hafa fengið fullnægjandi fræðslu þar á. Kannað var hvort ofangreindir þættir hefðu áhrif á að starfsmenn hefðu frekar verið í vafa um hvort þeir ættu að tilkynna til barnaverndarnefndar sem og á tilkynningar. Loks var reynt að ná fram áhyggjum starfsmanna, ef einhverjar væru, á áhrif tilkynninga á samband þeirra við foreldra. Spurningalistar voru lagðir fyrir starfsmenn á níu leikskólum í Hafnarfirði og á Austfjörðum. Svarhlutfall var 63,9%. Spurningarnar beindust að fræðslu og þekkingu á ofbeldi og vanrækslu gagnvart börnum auk þess sem spurt var hvort leikskólastarfsmenn hafi verið í vafa um hvort þeir ættu að tilkynna til barnaverndarnefndar. Þá var spurt hvort þeir hefðu tilkynnt til barnaverndarnefndar vegna gruns í núverandi starfi.Niðurstöður bentu til að leikskólastarfsmenn töldu sig almennt hafa nokkuð góða þekkingu á ofbeldi og vanrækslu en ekki hafa fengið fullnægjandi fræðslu þar á. Þátttakendur töldu sig þekkja verndandi þætti nokkuð vel. Aukin fræðsla og þekking á verndandi þáttum í barnavernd skilaði sér í að leikskólastarfsmenn voru frekar í vafa um hvort þeir ættu tilkynna. Þeir starfsmenn sem mátu þekkingu sína góða voru líklegri til að hafa tilkynnt. Tæpur helmingur starfsmanna hafði áhyggjur af því að tilkynning til barnaverndarnefndar hefði áhrif á samband þeirra við foreldra. Helstu áhyggjur þátttakenda voru að tilkynning hefði áhrif á sig sem tilkynnanda, að stærð samfélagsins gerði þeim erfitt fyrir sem og að traust við foreldra væri brotið. Lykilorð: Barnavernd, ofbeldi,vanræksla, tilkynningar, leikskólastarfsmenn.