Tekið á álfum nútímans. Lagaumhverfi og stefnumótun íslenskra stjórnvalda í málefnum innflytjenda 2003-2013

Abstract

Út frá lögum, skýrslum, lagafrumvörpum, umsögnum, stefnu ríkisstjórnar og sveitastjórna, rannsóknum, greinarflokkum um útlendinga á Íslandi og viðtölum við innflytjendur og sérfræðinga í málaflokknum er ætlun mín að varpa ljósi á stefnumótun í innflytjendamálum, bæði um aðgengi og aðlögun, á seinasta rúma áratug, skýra hvaða kenning um stefnumótun stjórnvalda er best fallin að málaflokknum. Hvort mannréttindi þeirra sem ekki eru íslenskir ríkisborgarar eru virt og hvort nóg sé að kveða stefnu í orði sem ekki er framfylgt með fjármagni er álitamál. Einnig vil ég beina sjónum, með hliðsjón af gildandi lögum og stefnu, að ætlun innflytjenda á og upplifun þeirra af Íslandi og aðlögunarstefnu stjórnvalda og taka saman lítillega orðræðugreiningu hjá þingi og þjóð. Íslenskt samfélag sem óðum breytist í fjölmenningarlegt hefur verið mjög lánsamt með þorra fólks sem flust hefur búferlum hingað en ávallt er hætta á að menningarlegur munur eða viðhorf til hans verði til þess að hleypa umróti í samfélagið. Hafa stjórnvöld sinnt jafnræðisreglunni og forðast aðskilnað fólks af ólíkum uppruna og ef ekki, er einhver aðskilnaður?