Áhrif ADHD einkenna á aðlögunarfærni barna með röskun á einhverfurófi

Abstract

Frá og með nýrri útgáfu DSM er nú leyfilegt að greina athyglisbrest með ofvirkni samhliða röskun á einhverfurófi. Aðlögunarfærni barna með röskun á einhverfurófi er lakari en hugræn geta þeirra. Þessari rannsókn er ætlað að meta hvort og hvernig ADHD einkenni hjá börnum með röskun á einhverfurófi hafi áhrif á aðlögunarfærni þeirra. Þátttakendur voru 125 börn á aldrinum 7-12 ára sem greind voru með röskun á einhverfurófi á Greiningar- og ráðgjafarstöð ríkisins á árunum 2008-2010. Notuð voru gögn þeirra sem voru með fyrirliggjandi niðurstöður foreldra- og kennaramats á ADHD-listanum en mat kennara vantaði fyrir tvo þátttakendur. Heildartala foreldra- og kennaramats á ADHD-listanum var notuð til þess að skoða hvort aðlögunarfærni skertist með auknum ADHD einkennum. Notuð var einföld aðfallsgreining til þess að meta samband breytanna. Niðurstöður leiddu í ljós að línulegt samband er á milli mats foreldra og aðlögunarfærni en samband á mati kennara og aðlögunarfærni reyndist ómarktækt.