Vinsamlegast notið þetta auðkenni þegar þið vitnið til verksins eða tengið í það: http://hdl.handle.net/1946/11677
Tímasetning fars og fjöldaferill að vorlagi og haustlagi meðal íslenskra skógarþrasta voru skoðuð með hjálp staðlaðra merkingagagna frá Höfn í Hornafirði á árunum 2005-2010. Þá var aldurssamsetning í veiðum að haustlagi skoðuð á Höfn og í Reykjavík og einnig hvernig fuglarnir þyngdust yfir haustfarið í Reykjavík.
Tvenns konar mynstur kom fram á vorfari. Annars vegar komu fuglar jafnt og þétt yfir vorið og náði fjöldinn þá hámarki um 10. apríl. Hins vegar var um að ræða seina innkomu fugla (um 10. apríl) og í kjölfarið mikla fjölgun sem náði hámarki tíu dögum síðar og rénaði síðan á sama hraða. Líklegt er að veðurtengdir þættir komi við sögu.
Hautfarið var á hinn bóginn mjög breytilegt og illútskýranlegt. Mikil þörf er á betri upplýsingum sem geta gefið til kynna hvort veiðitölur að hausti endurspegli stofnvísitölu meðal skógarþrasta. Mikill munur reyndist á hlutfalli ungfugla á milli ára og gæti sá munur endurspeglað varpárangur sumarið á undan. Þó vakti athygli hversu breytilegt hlutfall ungfugla var innan hausttímabila. Þrestir þyngdust að meðaltali um 0,6g á dag yfir októbermánuð og fullorðnir fuglar voru þyngri en ungir yfir tímabilið.
Skráarnafn | Stærð | Aðgangur | Lýsing | Skráartegund | |
---|---|---|---|---|---|
Rannsóknarverkefni.pdf | 1.03 MB | Opinn | Heildartexti | Skoða/Opna |