Atburðir úr gönguferðum með hund og Geðlæknirinn. Smásögur

Abstract

Smásagnasafnið „Atburðir úr gönguferðum með hund og Geðlæknirinn“ hefur að geyma söguna um „Geðlækninn“ auk fimm smásagna sem allar eiga það sameiginlegt að ein persónanna er kona með hund. Hugmyndir fjögurra þeirra fæddust beinlínis í gönguferðum höfundarins með hundinn sinn. En konur sögunnar eru ólíkar innbyrðis og eiga fátt skylt með höfundinum annað en hundinn. Segja má að sögurnar birtist eins og svipmyndir, við fáum að skyggnast litla stund inn í hversdaginn hjá persónunum en þurfum jafnhraðan frá að hverfa. Þær eru í senn kímnar og tregafullar og persónurnar fjölbreytilegar.„Geðlæknirinn“ sem er lengsta sagan í bókinni og sú eina sem er hundlaus, er af öðru tagi og þar er öllu flóknari söguþráður. Hún fjallar um miðaldra mann og unga konu sem verður á vegi hans fyrir tilviljun. Þau tengjast vináttuböndum. Við nánari kynni kemst unga konan að því að hann á sér sögu sem hún á bágt með að kyngja.