Mér liggur á hjarta : innstillingaræfingin "tékk-inn" - brú á milli hversdagsleikans og rýmis til sköpunar

Abstract

Tékk-inn er innstillingaræfing sem brúar bilið á milli hins almenna hversdagsleika og rýmis til sköpunar. Hér verða skoðuð áhrif tékk-inn æfingarinnar á sköpunarferli með unglingum. Markmið æfingarinnar er að ná skilyrðislausri hlustun, skilningi á ólíkum hugarheimum einstaklinga og að skapa pláss fyrir óhefta tjáningu. Sköpunarferlið sem hér um ræðir er uppsetning söngleikjarins Mamma Mía með 10. bekkjar árgangi Víðistaðaskóla. Inntak og markmið tékk-inn æfingarinnar verða tengd við fræði úr ýmsum áttum; þar á meðal kennslufræði, heimspeki og leiklist en einnig verða Aðalnámskrá grunnskóla og grunnþættir menntunar skoðaðir í tengslum við æfinguna. Unnið verður úr upptökum fyrstu og síðustu tékk-inn æfingar sköpunarferlisins og út frá því verða niðurstöður túlkaðar og ræddar.Markmið verkefnisins í heild er að sýna fram á að tékk-inn æfingin hafi styrkjandi áhrif á einstaklinginn, stuðli að aukinni sjálfsþekkingu og hafi samræmandi áhrif á hópa. Sumar hugsanir búa í hugarheimi einstaklings en fá aldrei að verða að orðum. Eiga einhverjar þeirra sér tilverurétt en vantar aðstæður til að heyrast? Í gegnum tékk-inn æfinguna tengjumst við sem hópur, drögum okkur frá hinu almenna og inn í nýja orku: Sköpunarorku.