Náttúrufræði og vísindi í leikskóla : verkefnasafn um veður, ljós og skugga, árstíðir og sólargang

Abstract

Verkefnasafn þetta er lokaverkefni mitt í B.Ed.-námi í leikskólakennarafræðum við Háskóla Íslands. Það verkefnasafn sem hér hefur verið sett saman er framlag mitt til kennslu og eflingu í náttúrufræðum og vísindum í leikskólum. Verkefnasafnið er samansafn verkefna um nokkur þeirra eðlisfræðilegu fyrirbæra sem við upplifum daglega í umhverfi okkar. Veður, ljós og skuggar, árstíðirnar og sólargangurinn eru þau viðfangsefni sem verkefnasafnið tekur á. Í verkefnunum er lögð áhersla á að samþætta útikennslu og könnunaraðferðina við framkvæmd verkefnanna. Verkefnasafnið er hugsað sem námsefni sem starfsmenn leikskóla geta stuðst við í kennslu í náttúrufræðum og vísindum með börnum. Meginmarkmið verkefnasafnsins er tvíþætt. Annars vegar að kynna fyrir börnum og vekja áhuga þeirra á eðlisfræðilegum fyrirbærum sem við upplifum daglega í umhverfi okkar, veðurfari, ljósi og skugga, gangi sólar og árstíðum og hins vegar að ýta undir umhverfisvitund þeirra og leiða þau í smáum skrefum í átt til menntunar í sjálfbærni og umhverfismennt. Verkefni safnsins voru prófuð og þróuð á leikskólanum Vesturborg með börnum á aldrinum 4 - 5 ára. Foreldrar og starfsfólk leikskólans sýndu verkefninu gott viðmót og áhuga og mikla jákvæðni mátti finna fyrir gagnvart verkefninu í heild.