Hvað með stelpurnar? Að komast á stórmót er ekki það sama og að komast á stórmót

Abstract

Greinargerð og þrjár greinar í dagblaði eru lokaverkefni mitt til MA–prófs í Blaða- og fréttamennsku við Háskóla Íslands. Greinargerðin lýsir undirbúningi og vinnuferli við gerð verkefnisins sem fjallar um fjölmiðlaumfjöllun þegar annars vegar kvennalandsliðið og hins vegar karlalandsliðið í knattspyrnu komust í fyrsta skipti á stórmót í knattspyrnu. Í greinargerðinni er stiklað á stóru við vinnslu blaðagreinanna þriggja. Var umfjöllun tveggja stærstu dagblaða landsins, Fréttablaðsins og Morgunblaðsins, nógu góð þegar kvennalandsliðið komst á Evrópumótið sem fram fór í Finnlandi árið 2009? Fengu karlarnir meiri athygli síðasta haust þegar þeir tryggðu sér þátttökuréttinn á Evrópumótinu sem fer fram í Frakklandi í sumar? Niðurstöður mínar eru þær að bæði lið hafi fengið mikla og góða umfjöllun þegar þessum merku áföngum var náð. Hins vegar virðist stemningin í þjóðfélaginu hafa verið meiri karlamegin og sést það að einhverju leyti í umfjöllun fjölmiðla.Það er staðreynd að konur og kvennaíþróttir fá minni athygli fjölmiðla en karlar og þeirra íþróttaiðkun. Því verður líka rætt við fólk sem tengist kvennalandsliðinu, fjölmiðlamenn og félagsfræðing og þau spurð hvað þeim finnist um umfjöllun í tengslum við þessa stórviðburði; að komast á stórmót í knattspyrnu.