Kynjahlutföll í sveitarstjórn, viðhorf til jafnréttismála og kosningahegðun. Tilviksrannsókn á Borgarfjarðarhreppi

Abstract

Borgarfjarðarhreppur er lítið sveitarfélag þar sem kosið er til sveitarstjórnar með óbundinni kosningu og jafnframt eina sveitarfélagið á landinu þar sem engin kona situr í sveitarstjórn. Tilgangur þessa verkefnis er að leita svara við því hvað kunni að skýra að konur nái ekki kjöri til sveitarstjórnar í Borgarfjarðarhreppi. Eins er það von rannsakanda að rannsóknin geti gefið vísbendingar um ástæður þess að kynjahlutfall er almennt ójafnara í sveitarstjórnum minni sveitarfélaga en stærri. Leitað er skýringa út frá fræðilegri flokkun aðstæðna fyrir ójöfnu kynjahlutfalli í stjórnmálum. Við rannsóknina var beitt megindlegum rannsóknaraðferðum og spurningakönnun lögð fyrir alla íbúa í Borgarfjarðarhreppi yfir 18 ára aldri. Kannað er hvaða þættir hafi áhrif á val kjósenda á fulltrúum í sveitarstjórn og hvort viðhorf til jafnréttismála endurspeglist í kosningahegðun. Niðurstöður benda til þess að skýringa á því að konur nái ekki kjöri í sveitarstjórn megi leita víða. Félags- og efnahagslegar ástæður hafi ekki úrslitaáhrif en skýringa megi leita í kosningakerfinu og smæð sveitarfélagsins. Þá hafi menningarlegar aðstæður á borð við sterkt tengslanet karla og viðhorf til jafnréttismála áhrif á kosningahegðun.