Lögreglan á samfélagsmiðlum: Traust almennings til lögreglu í kjölfar notkunar hennar á samfélagsmiðlum

Abstract

Lögreglan á höfuðborgarsvæðinu hefur á síðustu árum fengið töluverða athygli, bæði á Íslandi og erlendis, fyrir þátttöku sína á samfélagsmiðlum. Í ljósi þess var ákveðið að skoða hvort þátttaka lögreglunnar á samfélagsmiðlum hafi áhrif á traust almennings til hennar. Gengið var út frá kenningum um siðferðislega samstöðu og athugað hvort lögreglunni takist, með notkun sinni á samfélagsmiðlum, að sýna almenningi betur að hún endurspegli og viðhaldi gildum samfélagsins. Til þess að leita svara við þessari spurningu voru notuð gögn sem lögreglan á höfuðborgarsvæðinu fær send frá Facebook. Varpað var ljósi á almenn störf lögreglunnar á samfélagsmiðlum, ásamt því að hegðun fylgjenda var greind í kjölfar þeirrar samfélagslegu umræðu sem á sér stað í tengslum við lögreglu hverju sinni. Umfjöllunin leiddi í ljós að tengsl er að finna á milli mælinga á trausti og hegðun fylgjenda lögreglunnar á höfuðborgarsvæðinu, ásamt því að samfélagsleg umræða í kringum lögregluna virðist hafa töluverð áhrif á hegðun fylgjenda.