Ástandið: Viðhorf og orðræða í sögulegu og fjölþjóðlegu samhengi

Abstract

Á hernámsárunum skapaðist mikil umræða um samskipti íslenskra kvenna og erlendra hermanna. Umræðan um hegðun kvenna var oft óvægin og flest sem konur tóku sér fyrir hendur gert að umræðuefni, sérstaklega þegar ungar konur áttu í hlut. Rætt var um „ástandið“. Siðspilling, spilling kynstofnsins sem og staða ungmenna í Reykjavík voru meðal þeirra þátta sem ræddir voru. Fór svo að ríkisvaldið brást við umræðunni með því að setja lög um eftirlit með ungmennum. Í þessari ritgerð er ástandið sett í samhengi við þá umræðu sem birtist um konur, kynlíf og barnavernd á millistríðsárunum ásamt þvíhvernig þjóðernisleg umræða litaði þessar hugmyndir. Einnig verður sýnt fram á að„ástandið“ á Íslandi var ekki einstakt, hvorki í tíma né rúmi. Íslenska ástandið er borið saman við það sem átti sér stað í Bretlandi og Ástralíu þegar bandarískir hermenn komu þangað og þá orðræðu sem átti sér stað í þeim löndum. Markmiðið er að sýna fram á þær fjölþættu hugmyndir sem lágu að baki því að sett voru lög um eftirlit með ungmennum.