Offjölgun og ættleiðingar. Áhrif einbirnisstefnunnar á kynjaskekkjuna í Kína og ættleiðingar úr landi

Abstract

Viðfangsefni þessar ritgerðar er að skoða kynjaskekkjuna sem hefur orðið í Kína eftir að einbirnisstefnan var sett á og hvaða áhrif hún hefur haft á ættleiðingar barna út úr landi. Þetta er stórt og mikið viðfangsefni sem áhugavert er að skoða. Árið 1979 var einbirnisstefnan sett á allt landið sem gerði það að verkum að fólk mátti aðeins eignast eitt barn. Var þessi stefna sett á í þeirri von um að sporna við þeirri miklu fólksfjölgun sem var að eiga sér stað í Kína á þessum tíma. Á sama tíma ýtti stefnan undir það að fólk sem átti fyrir barn eða vildi aðeins eignast son yfirgáfu nýfædd börn. Enda fylgdi há sekt ef börnin á heimilinu voru fleiri en eitt. Mörg þúsund börn eru yfirgefin ár hvert í þessu stóra landi sem Kína er og mörg þeirra eiga sér enga von en allmörg þessara yfirgefnu barna eru ættleidd úr landi. Margar hliðar eru á ættleiðingu og því hægt að velta mörgu fyrir sér hvað hana varðar, en fyrir þessa ritgerð varð ég að velja hnitmiðað efni og varð kynjaskekkjan í Kína fyrir valinu og hvort hún hefði hugsanlega áhrif á ættleiðingar úr landi. Í ritgerðinni er leitast við að svara spurningu um tengingu milli kynjaskekkjunnar og ættleiðinga barna úr landi.