en English is Íslenska

Thesis University of Iceland > Heilbrigðisvísindasvið > B.S. verkefni - Heilbrigðisvísindasvið >

Please use this identifier to cite or link to this item: http://hdl.handle.net/1946/24569

Title: 
  • is Áhrif meðgöngulengdar á námsárangur
Submitted: 
  • May 2016
Abstract: 
  • is

    Inngangur: Þekkt er að fyrirburar eru í aukinni áhættu á að greinast með langvinna sjúkdóma eins og heilalömun og einhverfu. Aðrar afleiðingar geta t.d. verið hegðunar- og námsörðugleikar en rannsóknir hafa sýnt fram á að fyrirburar, og sérstaklega allra minnstu fyrirburarnir, fá marktækt lægri einkunnir en samnemendur þeirra sem fæddir eru eftir fulla meðgöngu. Ekki er með fullu vitað hvort meðgöngulengd hafi áhrif á einkunnir fullburða barna en rannsókn frá árinu 2012 sýndi fram á að börn fædd eftir 37-38 vikna meðgöngu fá marktækt lægri einkunnir en börn fædd eftir 39-41 vikna meðgöngu.
    Efniviður og aðferðir: Unnið var með tilbúið gagnasafn sem safnað var í tengslum við rannsóknina LIFECOURSE. Þeirra gagna hafði verið aflað frá Fæðingaskrá Landlæknis, Námsmatsstofnun og Hagstofunni. Í rannsóknarhópnum voru öll börn fædd og með búsetu í Reykjavík árið 2000. Fengnar voru upplýsingar um einkunnir á samræmdum prófum í íslensku og stærðfræði í 4. og 7. bekk.
    Niðurstöður: Aukin meðgöngulengd veldur marktækri hækkun á einkunn í samræmdum prófum í stærðfræði bæði í 4. og 7. bekk eftir að leiðrétt hefur verið fyrir helstu bjögum. Meðgöngulengd sýndi ekki marktæk áhrif á heildareinkunn í íslensku, hvorki í 4. né 7. bekk. Ekki fannst marktækur munur á einkunnum fyrirbura og fullburða barna nema í ritun í 7. bekk þar sem fullburða börn fengu 31,8% hærri einkunn en fyrirburar. Þegar gögnunum var lagskipt eftir kyni kom í ljós að áhrif meðgöngulengdar á einkunnir voru einungis til staðar hjá strákum þar sem marktæk hækkun var á einkunn í íslensku og stærðfræði með aukinni meðgöngulengd bæði í 4. og 7. bekk. Hjá stelpum voru áhrif meðgöngulengdar á heildareinkunn aldrei marktæk. Meðgöngulengd sýndi marktæk áhrif á einkunn í 9 af 13 undirgreinum samræmdu prófanna hjá strákum en aðeins á 1 af 13 undirgreinum hjá stelpum. Áhrifa meðgöngulengdar gætir einnig hjá fullburða börnum (fæddum eftir 37 – 42 vikna meðgöngu) en þar kom fram marktæk hækkun á einkunn í íslensku og stærðfræði með aukinni meðgöngulengd bæði í 4. og 7. bekk. Einnig fannst marktækur munur á einkunnum snemmbura (37-38 vikna meðganga) og full- og síðbura (>39 vikna meðganga) þar sem full- og síðburar fengu marktækt hærri einkunnir. Þegar betur var að gáð voru áhrif meðgöngulengdar á einkunnir fullburða barna einungis til staðar hjá strákum.
    Ályktanir: Niðurstöður þessarar rannsóknar benda til þess að meðgöngulengd hafi marktæk áhrif á einkunnir á samræmdum prófum. Fyrri rannsóknir hafa sýnt fram á að fyrirburar fái lægri einkunnir en fullburða börn en fáar rannsóknir taka til línulegra áhrifa meðgöngulengdar. Nýlegar rannsóknir hafa bent á að aukin meðgöngulengd fullburða barna spáir fyrir um betra gengi í skóla. Niðurstöður þessarar rannsóknar styrkja þær niðurstöður þar sem meðgöngulengd fullburða barna hefur umtalsverð áhrif á einkunn. Mjög skýr kynjamunur kom fram í áhrifum meðgöngulengdar þar sem áhrifanna gætti einungis hjá strákum og væri áhugavert að skoða það nánar.

Accepted: 
  • May 12, 2016
URI: 
  • http://hdl.handle.net/1946/24569


Files in This Item:
Filename Size VisibilityDescriptionFormat 
Áhrif meðgöngulengdar á námsárangur - Elín.pdf1.46 MBLocked Until...2019/05/13HeildartextiPDF