Tólfan: Stuðningsmannasveit íslenskra landsliða

Abstract

Í þessari ritgerð er fjallað um Tólfuna, stuðningsmannasveit íslensku knattspyrnulandsliðanna. Lögð er áherslu á stuðning hópsins við A-landslið karla og kvenna, sem og yngri landsliða Íslands, í knattspyrnu. Einnig er aðkoma hópsins að stuðningi annarra landsliða Íslands í hinum ýmsu íþróttagreinum, svo sem körfuknattleik, handbolta og íshokkí, rædd. Leitast er við að draga upp mynd af þeim einstaklingum sem hópinn skipa með því að taka hálfopin viðtöl við þá aðila sem næst efninu standa. Við gagnasöfnun tók safnari viðtöl við núverandi og fyrrverandi formenn Tólfunnar sem og annan af tveimur landsliðsþjálfurum karlalandsliðs Íslands í knattspyrnu. Ritgerðin einblínir á tímann frá formlegri stofnun Tólfunnar árið 2007 til loka undankeppni evrópumeistaramóts karlalandsliða í knattspyrnu sumarið 2016 sem fram fer í Frakklandi og Ísland tekur þátt í. Rakin er saga Tólfunnar og spurt hver munurinn sé á Tólfunni og öðrum stuðningsmönnum eða áhorfendum á leikvangnum. Einnig er spurningum um mikilvægi stuðningsmanna í knattspyrnu velt upp og það mikilvægi skoðað út frá sjónarhorni þjálfarans og hins almenna knattspyrnuáhugamanns. Í niðurstöðum ritgerðarinnar er gerð grein fyrir tengslum Tólfunnar við hugtök og kenningar sem í aðferðarfræðikafla eru gerð skil.