Prentpunkturinn : sögulegt yfirlit og greining á göllum hefðbundinnar leturmælingar

Abstract

Tilgangur ritgerðarinnar er að skoða prentpunktinn (e. typographic point); einingu sem notuð er til að mæla letur; og greina galla hans ásamt því að skoða ástæðuna fyrir notkun hans á okkar tímum. Á 20. öldinni urðu gífurlega miklar og hraðar framfarir í prenttækni sem leiddi til þess að notkun prentpunktsins og tilgangur hefur tekið stakkaskiptum, en engu að síður virðist punkturinn að mestu hafa staðið í stað og ekki aðlagað sig breyttum tímum. Leitað var í greinar og bækur sem gefnar hafa verið út um efnið á síðustu öld, en um miðbik hennar virtust vera miklar umræður um réttmæti tilvistar prentpunktsins. Að auki var rætt við hönnuði til að fá þeirra álit á punktinum og innsýn inní notkun hans. Í ljós kom að punkturinn er ekki að þjóna sínum tilgangi sem mælieining og að nokkrar tilraunir voru gerðar á 20. öldinni til að koma með nýja samræmda mælieiningu fyrir letur sem virtust allar falla í tómið. Niðurstaðan er sú að prentpunkturinn sé úreltur og eigi ekki lengur heima sem staðlað tæki í skapandi fagi. Kominn er tími á að taka málið upp að nýju og leggja vinnu í að finna samræmda mælieiningu fyrir letur með tilliti til samtímans og jafnvel hugsa uppá nýtt hvernig letur er mælt því það gæti vel opnað á nýja möguleika með hvernig við hugsum um letur.