Hreyfifærni barna í 1. bekk

Abstract

Tilgangur: Tilgangur rannsóknarinnar er að athuga hvort kynjamunur sé á hreyfifærni barna í 1. bekk. Aðferð: Þátttakendur rannsóknarinnar voru 93 talsins og af þeim voru 39 drengir (41,94%) og 54 stúlkur (58,06%). Þátttakendur voru nemendur í 1. bekk á aldrinum sex til sjö ára. Allir þátttakendurnir í rannsókninni komu úr tveimur grunnskólum, annars vegar úr Kópavogi og hins vegar úr Fossvogi. Þátttakendur þreyttu fjögur hreyfifærnipróf; raða kubbum á spjald, raða kubbum í turn, hæl tá göngu og áttuhlaup. Þessi fjögur próf innihalda bæði gróf- og fínhreyfingar. Niðurstöður: Marktækur munur kom fram í tveimur af fjórum prófunum. Marktækur munur kom fram í prófinu raða kubbum í turn í þágu stúlkna og einnig kom fram marktækur munur á hæl tá göngu í þágu drengja. Niðurstöður hinna prófanna voru ekki marktækar en þó skoruðu stúlkur hærra í prófinu raða kubbum á spjald og drengir fengu betri niðurstöður í áttuhlaupi. Ályktanir: Niðurstöður rannsóknarinnar sýna að munur er á hreyfifærni eftir kyni. Það má segja að stúlkur skori betur á prófum tengdum fínhreyfingum og drengir skori betur á prófum tengdum grófhreyfingum. Þessi munur gæti orsakast af mismunandi félagsmótun og umhverfisáhrifum á kynin.