Samsöngur í íslensku skólastarfi : sönglögin sem Íslendingar eiga að kunna að mati tónmenntakennara

Abstract

Markmið þessa verkefnis er að kanna hvaða sönglög tónmenntakennurum finnst að allir Íslendingar eigi að kunna. Um leið er markmiðið að skoða sögu söng- og tónmennta-kennslu í grunnskólum landsins og hvert gildi samsöngs er fyrir þá sem syngja saman í hóp. Uppbygging verkefnisins er þannig að fyrst er sagt frá söng sem fyrirbæri, því næst farið yfir söng- og tónmenntakennslu í tengslum við námskrár sem komið hafa út á Íslandi. Þá er farið yfir gildi samsöngs, hvað hafa þarf í huga við lagaval og útgefið efni ætlað til söngkennslu í grunnskólum skoðað með lagaval í huga. Gagna var aflað með því að leggja spurningalista fyrir tónmenntakennara sem eru á póstlista Tónmenntakennarafélags Íslands. Gögnin voru svo borin saman við niðurstöður svipaðrar könnunar sem Þórunn Björnsdóttir gerði árið 1991 en sú könnun var kveikjan að þessu lokaverkefni. Þegar gögnin voru greind var skoðað hvað, ef eitthvað, hafði breyst frá fyrri könnuninni og hugsanlegar ástæður settar fram. Helstu niðurstöður voru þær að tónmenntakennarar virðast vera meðvitaðir um að viðhalda þekkingu á lögum sem lifað hafa með þjóðinni lengi en ný lög bætast reglulega við. Breytingin frá árinu 1991 er ekki mikil en virðist vera í takt við þær áherslur í tónmenntakennslu að auka víðsýni með fjölbreyttri tónlist.