Hvers vegna er hreyfing mikilvæg fyrir börn?

Abstract

Þessi ritgerð er lokaverkefni til B.A- prófs í uppeldis- og menntunarfræði við Háskóla Íslands. Meginviðfangsefni hennar er að skoða hreyfingu barna í leikskóla. Hreyfingarleysi er farið að aukast mikið í vestrænum heimi og einnig á Íslandi. Afleiðing þess getur verið offita barna en mörg börn eru komin í ofþyngd vegna þess að þau eru farin að stunda meiri afþreyingu þar sem þau þurfa ekki að hreyfa sig. Börn eru meirihluta dagsins í leikskólanum eða skólanum og því er mikilvægt að þar fái þau þá hreyfingu sem þau þurfa. Ráðlagt er að börn hreyfi sig í að minnsta kosti 60 mínútur á dag. Þegar farið er að meta þroska barna á fyrstu árum þeirra þá er oftast miðað við hreyfiþroskann því við eðlilegar aðstæður er hann reglulegur. Hann er ekki háður þroska á öðrum sviðum og er oftast nær reglubundinn hjá börnum sem eru ekki með neinar skerðingar. Fræðimennirnir John Dewey, Howard Gardner og Lev Vygotsky hafa sett fram kenningar sem tengjast hreyfingu og leikjum og þær hafa víða haft áhrif á leikskólastarf.Í lok verkefnisins er að finna nokkrar hugmyndir að leikjum sem hægt er að fara í með börnum bæði úti og inni. Vonandi munu leikskólakennarar, foreldrar og allir þeir sem vinna með börnum nýta sér þá leiki.