Aðgengilegar upplýsingar á auðskildu máli : mikilvægi þess að hafa heilbrigðisupplýsingar aðgengilegar fyrir fólk með þroskahömlun

Abstract

Þetta verkefni er lokaverkefni til BA-gráðu í þroskaþjálfafræðum við Háskóla Íslands. Verkefnið er þríþætt og skiptist í bækling, vefsíðu og greinargerð. Bæklingurinn er ætlaður til fræðslu og forvarna og í honum má finna heilsufarsupplýsingar á auðskildu máli fyrir fullorðið fólk með þroskahömlun. Vefsíðan var gerð með það að leiðarljósi að hýsa bæklinginn ásamt félagsfærnisögum og heilsuvegabréfi. Markmiðið með henni var að ná til fleira fólks með aðstoð veraldarvefsins. Í greinargerðinni er fjallað um mikilvægi þess að hafa heilsufarsupplýsingar aðgengilegar með því að skilgreina og fjalla um hugtök á borð við félagsleg og læknisfræðileg líkön, hugmyndafræðina um eðlilegt líf, valdeflingu og heilsueflingu. Einnig var stuðst við fyrri rannsóknir, samning Sameinuðu þjóðanna um réttindi fatlaðs fólks, lög og reglugerðir, sem og umfjöllun um heilsufar og forvarnir. Í kaflanum um bæklinginn má finna umfjöllun um þær heilsufarsupplýsingar sem þar birtast sem hluti af rökstuðningi fyrir því af hverju við völdum þá í bæklinginn. Markmið verkefnisins er mæta þörfum fólks með þroskahömlun hvað varðar aðgengi að mikilvægum heilsufarsupplýsingum. Rannsóknir hafa leitt í ljós að þessi hópur fólks er líklegri til að vera við lélegri heilsu en þeir sem ekki eru með þroskahömlun og verður oft útundan í heilbrigðisþjónustunni.