Heimanám : gagn eða ógagn?

Abstract

Í þessari ritgerð er fjallað um heimanám barna á yngsta stigi grunnskóla. Markmið ritgerðarinnar er að leitast við að svara þeirri spurningu hvort réttmætt sé að leggja heimanám fyrir nemendur á yngsta stigi grunnskóla og ef svo er, hvaða nám er þá mikilvægast. Heimanám er eitt form náms sem hefur verið lagt fyrir nemendur svo lengi sem elstu menn muna. Sagt er að það sé jafnvel hefð sem erfitt sé að rjúfa. Ágreiningur er meðal skólamanna og foreldra um gagnsemi þess, á meðan einn hópur telur að það bæti námsárangur nemenda telur annar hópur að það hafi engan tilgang og íþyngi bæði nemendum og foreldrum. Í ritgerðinni verður farið yfir sögu heimanáms og hvað heimanám er. Gerður er greinarmunur á hefðbundnu heimanámi og óhefðbundnu heimanámi. Útskýrð eru þau áhrif sem heimanám hefur og farið yfir það gagn sem það er talið hafa annars vegar og ógagn hins vegar. Forsenda heimanáms nemenda á yngsta stigi er samstarf foreldra og kennara og í ritgerðinni eru sett fram lykilatriði þess og fjallað um hugmyndir sem gætu auðveldað það. Fjallað er um þær miklu þjóðfélagsbreytingar sem hafa orðið á síðustu áratugum og eru farnar að valda því að tímaskortur hjá börnum og foreldrum getur komið í veg fyrir að heimanámi sé sinnt. Fjallað verður um rannsóknir sem hafa verið gerðar á viðhorfum kennara, foreldra og nemenda til heimanáms og niðurstöður þeirra kynntar.