Óreiða og öráreitni í almennu rými: Ógn fötlunar við félagslegan stöðugleika

Abstract

Í þessu verkefni er leitast við að skoða áhrif fötlunar á félagslega upplifun í almennu rými í ljósi kenninga og fyrri rannsókna sem gerð er grein fyrir í verkefninu. Sjónum er beint að félagslegri stöðu fatlaðs fólks í almennum rýmum og skoðuð þau áhrif og afleiðingar sem það hefur fyrir fatlað fólk ef tilvist þess ein og sér veldur truflun félagslegs stöðugleika. Kenningar og fyrri rannsóknir benda til þess að þó almennt sé gengið út frá félagslegum stöðugleika í mannlegum samskiptum einkennist félagslegur veruleiki fatlaðs fólks af félagslegu uppnámi og óreiðu vegna öráreitni (e. microaggressions) og ableisma (Campbell, 2009; Keller og Galgay, 2010). Þannig eru uppnám og óreiða hluti af hinum daglega hversdagsleika fatlaðs fólks en ekki tilfallandi atburður líkt og fyrri kenningar hafa gert ráð fyrir (Goffman, 1959). Í þessari óreiðu endar fatlað fólk sjálft milli steins og sleggju og upplifir sig bera ábyrgð á því að endurskapa félagslegan stöðugleika á sama tíma og því er jafnvel misboðið yfir hegðun ófatlaðs fólks (Keller og Galgay, 2010). Í verkefninu er rýnt í þessar aðstæður fatlaðs fólks og þær skoðaðar út frá kenningum um öráreitni, ableisma og félagslegan stöðugleika.