Áhrif Pontin og Reptin á þroskun skyntauga í Drosophila melanogaster

Abstract

Próteinin Pontin og Reptin eru af AAA+ próteinfjölskyldunni og hafa fjölþætta virkni. Próteinin taka þátt í mörgum af mikilvægustu ferlum frumunnar eins og t.d. stjórn á umritun, samsetningu á próteinflókum, litnisumbreytingum, skynjun á DNA skemmdum og hlutverk í DNA viðgerðarferlum. Við rannsóknir á hlutverkum próteina hafa fjölmargar aðferðir til að stjórna genatjáningu verið þróaðar í ávaxtaflugunni (Drosophila melanogaster). Það ásamt mörgum öðrum þáttum gera hana að kjörinni tilraunalífveru í rannsóknum tengdum starfsemi gena og virkni próteinafurða. Starfsemi Pontin og Reptin í taugamyndun hefur ekki verið mikið rannsökuð. Í þessari rannsókn var leitast við að skilgreina hlutverk Pontin og Reptin í þroskun skyntauga í ávaxtaflugulirfum. Var það gert með samanburðarrannsókn á bælingarstofnum og með uppsetningu svokallaðs MARCM-stofns til frekari rannsókna.