Framkvæmd fjárhagsaðstoðar í Hafnarfirði. Aðstoð til virkni, vinnu og sjálfshjálpar

Abstract

Í ritgerðinni er fjallað um framkvæmd fjárhagsaðstoðar í Hafnarfirði. Markmið ritgerðarinnar er að skoða með hvaða hætti breytingar á reglum um fjárhagsaðstoð hjá Hafnarfjarðarbæ höfðu áhrif á notendur. Gerð verður grein fyrir bakgrunni félagsþjónustu sveitarfélaga, lögum um félagsþjónustu sveitarfélaga og nýju frumvarpi til breytinga á þeim lögum. Fjallað verður um Áfram verkefnið í Hafnarfirði, upphaf þess og tilgang sem og farið yfir mat á árangri verkefnisins. Einnig eru reglur um fjárhagsaðstoð hjá Hafnarfjarðarbæ skoðaðar og farið verður yfir úrskurð í máli nr. 30/2014. Fjallað verður um leið til samfélagslegrar þátttöku. Farið verður yfir hlutverk félagsráðgjafa, valdeflingu og lífið á fjárhagsaðstoð. Þær spurningar sem leitað er svara við eru: Hvernig nýttist Áfram verkefnið notendum fjárhagsaðstoðar í Hafnarfirði? Hvað fela breyttar reglur fjárhagsaðstoðar hjá Hafnarfjarðarbæ í sér? Nýtast virkniúrræði notendum fjárhagsaðstoðar? Niðurstöður ritgerðarinnar eru að Áfram verkefnið í Hafnarfirði skilaði því að verulegur viðsnúningur varð innan bæjarins varðandi fjárhagsaðstoð á árinu 2014. 186 störf voru sköpuð, 160 notendum var vísað í vinnumiðlun og 72 einstaklingar hurfu af fjárhagsaðstoð og í launuð störf. Hafnarfjarðarbær vinnur með það að leiðarljósi að saman fari réttur einstaklinga til raunverulegrar aðstoðar með hvata til virkni með hagsmuni og velferð þeirra sem aðstoðar njóta í huga. Virkniúrræði nýtast notendum fjárhagsaðstoðar og bera árangur ef þau eru sniðin að þörfum einstaklinganna sem í þeim taka þátt og eru unnin í samvinnu milli notenda og ráðgjafa.