Skjáauglýsingar í kvikmyndahúsum: Áhrif skjáauglýsinga í kvikmyndahúsum á sælgætissölu

Abstract

Boðleiðir til neytenda hafa aldrei verið fleiri og ýmsir miðlar keppast um athygli og markaðsfé fyrirtækja. Erfitt getur verið fyrir stjórnendur fyrirtækja að átta sig á hvaða miðlar skili mestum árangri en oft er talað um kosti þess að nota óhefðbunda miðla í bland við hefðbundna miðla. Auglýsingar í kvikmyndahúsum teljast til óhefðbundinna miðla en talsverðum fjárhæðum er eytt í slíkar auglýsingar á ári hverju. Lítið er vitað um virkni þeirra en eftirtekt hefur verið algengasti mælikvarðinn á árangur auglýsinga í kvikmyndahúsum. Viðfangsefni rannsóknarinnar er áhrif skjáauglýsinga í kvikmyndahúsum á sölu í sjoppum kvikmyndahúsa. Markmiðið var að kanna hvort Maltesers-skjáauglýsing myndi auka sölu á Maltesers í kvikmyndahúsi A og kvikmyndahúsi B en rannsóknin var gerð í samstarfi við ónafngreind kvikmyndahús og Sláturfélag Suðurlands. Gögnum var safnað með aðstoð rekstrarstjóra kvikmyndahúsanna sem sendi rannsakanda vikulega upplýsingar um sölutölur. Auglýsingin var bæði sýnd í kvikmyndahúsi A og kvikmyndahúsi B og rannsóknin skiptist í tvö fimm vikna tímabil. Niðurstöður sýna að skjáauglýsingar hafa ekki áhrif á sölu í sjoppum kvikmyndahúsa og því má telja að auglýsingafé sé betur varið í aðra miðla, sem er í samræmi við fyrri rannsóknir sem gerðar hafa verið á sviðinu.