Stuðningur við millistjórnendur sveitarfélaga sem ekki hafa mannauðsstjóra í starfi

Abstract

Tilgangur verkefnisins er að skoða hvernig stuðningi við millistjórnendur er háttað í sveitarfélögum á Íslandi sem eru með fleiri en 800 íbúa en hafa ekki sérstakan mannauðsstjóra í starfi. Ritgerðin byggir á megindlegri rannsókn sem gerð var meðal millistjórnenda í áðurnefndum sveitarfélögum. Rannsakandi setti fram fjórar rannsóknarspurningar og þrjár rannsóknartilgátur. Við framsetningu niðurstaðna var tekið mið af rannsóknarspurningum og umræður settar upp í þemu með hliðsjón af rannsóknartilgátum. Rannsóknarspurningar: •Hver sinnir stuðningi við millistjórnendur þar sem ekki er sérstakur mannauðsstjóri í starfi og hvernig er honum háttað?•Hvernig stuðning telja millistjórnendur sig helst þurfa? •Hvað telja millistjórnendur helst standa í vegi fyrir nægum stuðningi í starfi?•Hvernig rímar sá stuðningur sem millistjórnendur fá og væntingar þeirra um stuðning í starfi við hugmyndafræði um mannauðsstjórnun.Rannsóknartilgátur: •Millistjórnendur í íslenskum sveitarfélögum fá ekki nægan faglegan stuðning í þeim sveitarfélögum sem ekki hafa sérstakt starf mannauðsstjóra.•Bolmagn íslenskra sveitarfélaga sem eru án mannauðsstjóra er ekki nægilega sterkt til að standa undir þeim stuðningi sem millistjórnendur telja sig þurfa í starfi. •Hugmyndafræði mannauðsstjórnunar endurspeglast ekki í þeim veruleika sem millistjórnendur íslenskra sveitarfélaga búa við hvað varðar stuðning í starfi.Spurningakönnun var send á 165 millistjórnendur íslenskra sveitarfélaga og var svarhlutfallið 68,48%. Í umræðum voru niðurstöður speglaðar í fræðilegri umfjöllun um bolmagn sveitarfélaga, mannauðsstjórnun, stefnumiðaða mannauðsstjórnun og rannsóknir á sviðinu skoðaðar. Helstu niðurstöður voru þær að það er nánasti undirmaður sem veitir millistjórnendum mestan stuðning af einstaka aðilum og að sá stuðningur felst í aðstoð við að leysa vandamál. Nærri helmingur millistjórnenda telja sig þurfa á meiri stuðningi að halda en þeir eiga aðgang að. Sá stuðningur sem millistjórnendur telja sig mest þurfa á að halda er stuðningur við erfið starfsmannamál og einnig almenna faglega ráðgjöf. Ástæðuna fyrir ónógum stuðningi telja millistjórnendur helst vera áhugaleysi sveitarstjórnar eða yfirmanna og því næst skortur á fjárhagslegu bolmagni.