Ber kynbundinn launamunur vitni um að konum sé mismunað. Eru hagfræðingar og femínistar á sama máli ?

Abstract

Í þessari ritgerð er fjallað um hagfræðikenningar um mismunun á vinnumarkaði og það hvernig hagrænir hvatar eru að verki sem útskýra kynbundinn launamun. Þá er lítillega fjallað um kenningar úr fleiri fræðigreinum - líffræði, sagnfræði og sálfræði, sem tengjast umfjöllunarefninu og styrkja niðurstöður hagfræðinnar. Samræmi eða ósamræmi á milli skýringa kenninga hagfræði og kenninga femínisma á launamun kynjanna er dregið fram í dagsljósið. Gerð er grein fyrir tengslum hefðbundinnar verkaskiptingar í hjónabandi og kynbundins launamunar. Einnig er gerð grein fyrir því hvernig hagrænir hvatar vegna kynbundinna hlutfallslegra yfirburða eru að verki í hjónabandinu. Mikilvægi mæðrahlutverksins fyrir myndun mannauðs barna er tíundað, en einnig hvernig mæðrahlutverkið lækkar mannauð móðurinnar og atvinnutekjur og eykur þannig launamun kynjanna. Mikilvægi gildismats eða félagsmótunar fyrir náms- og starfsval kynjanna er reifað og fjallað er bæði um mögulega hagkvæmni sem og óhagkvæmni kynjaskipts vinnumarkaðar með tilliti til áhrifa á kynbundinn launamun. Mismunur á vinnumarkaðslegum viðhorfum og hegðun kynjanna er skoðaður og grein er gerð fyrir compensating differential kenningunni og atvinnutengdum sjúkdómum og dauðsföllum sem fylgja karlastarfsgreinum.